Historia Prekolonial


Korsoun, nos isla bunita den e awanan di Karibe, tabata habita pa e indianan Kaketio for di añanan 2300 – 2900 prome ku Kristu. Esaki a wordu analisa for di restunan ku a wòrdu enkontra hopi aña pasa, kual ta konsistí di sobrá di kokolishi, wesu di animal i piedra. Antes e materialnan enkontra tabata wòrdu husa pa diferente proposito. Na Rooi Rincon den e barankanan, bo por mira pista humanonan di e Kaketionan ku tabata biba aki na Kòrsou.



Diskurbimentu di e Spaño nan


Kòrsou a wòrdu diskubrí riba 26 di juli 1499 dor di e Spaño Alonso de Ojeda. Despues, mas o menos 2000 Kaketio a bin biba riba nos isla tropikal. E Kaketionan ta bin di e Indjan nan Arawak. Na aña 1515 e Spañonan a hiba kasi tur e Kaketio nan komo katibu pa e pais Hispaniola, un otro isla den Karibe.


12 aña despues (1527) e Spañonan a disidi bin biba na Kòrsou. Nan a trese kabai, karné, kabritu I diferente otro bestia for di Europa. Ademas nan a planta yen tipo di mata tambe. No ta tur e palunan ku nan a trese a sobrebibí. E bestianan en general si a bai bon. E Kaketionan ku no a wordu transporta pa Hispaniola i e Spañonan tabata kuida e bestianan.


Ku e agrikultura si, e Spañonan no tabatin suerte. E ganashi di agrikultura tabata desepshonante, paso e saliñanan no tabata trese hopi produkshon. Ademas no tabatin metal presioso na Kòrsou, kual e Spaño nan a kuminsa yama Kòrsou ‘isla inútil’. Pesei ku tempu e Spañonan a kuminsa bai for di Kòrsou. Despues e Indjan nan a bin biba bèk Kòrsou. Nan tabata bibá partí riba nos isla.



West India Company


Na aña 1634 West India Company (WIC) a konkistá Kòrsou for di e Spañonan. E Spañonan ku a keda riba e isla a rindi i nan a wòrdu hibá pa Venezuela dor di e Hulandesnan. WIC tabata buskando un base pa komèrsio i korso, Kòrsou tabata e luga mas faborabel. Tambe Kòrsou tabatin e mihó haf di Karibe e tempu ei. WIC tabata buska tambe un bon fuente di salu. Tantu na e kosta di Venezuela komo na Bonèiru tabatin bon saliña.


WIC tabata esun responsabel pa e konstruí e famoso fòrti, Fòrt Amsterdam , kual awòki e gobièrnu di Kòrsou ta sinta aden. Na 1634 e Hulandes nan a kuminsa konstruí Fort Amsterdam bou di mando di atmiral Johan van Walbeek. E trahamentu di fòrti a kosta hopi plaka, pero e produkshon tabata tiki. Ku tempu Kòrsou a demonstrá su balor pa ku WIC.



Image credits: Norman B Leventhal

Despues di a pèrdè e kolonia Brasilero na 1654, Kòrsou a bira mas importante pa WIC. E komèrsio tantu na Terra Fierme na Venezuela, komo esun nan den e otro paísnan den Karibe, tabata posibel danki na e lokalidat faborabel di Kòrsou.


E poblashon di Kòrsou a krese dor di e Hudíunan Sefardita ku a bin di Brazil. WIC a habri Kòrsou tambe pa Oropeonan ku kier a bin kultivá aki. Ademas, sòldatnan ku a retirá tambe tabata bon biní pa bin biba akinan. WIC tabata ke pa kunukeronan kuminsa planta i kultivá pa produsí kuminda pa hinter e poblashon di Kòrsou. E prome plantashinan a wòrdu poné na aña 1650.



Komèrsio di katibu i puerto liber


West India Company a kuminsa ku komèrsio di katibu na Kòrsou na aña 1655. E katibunan tabata wòrdu trese na Kòrsou, for di Wèst- Áfrika. E katibunan tabata wòrdu bendé na plantashi di Zürzak i na Asiento. WIC tabata bende e katibunan na preis nan hopi kompetitivo i asina e tabata kompetí ku komersiantenan Ingles, Franses i Portuges. E katibunan tabata wòrdu kumprá pa diferente komersiante, i nan tabata wòrdu hibá na diferente país na Sentroamérika i Sur-amérika.


Solamente un par di e Afrikanonan a keda na Kòrsou i nan tabata keda riba e plantashinan na Kòrsou. Un parti di e katibunan ei a wòrdu kumprá pa komersiantenan i artesanonan i nan tabata biba den bisendario di Willemstad . Willemstad a nase den e di 2 mitar di siglo 17 i e tabata situá banda di Fort Amsterdam den Punda.


Kòrsou a kombertí den un puerto liber na 1674, kual a duné un posishon klave den e ret di komèrsio internashonal. Dor di esaki Kòrsou a bira un di e islanan mas prosperá den Karibe.



Kolonia Hulandes


Despues ku WIC a bai bankarota , Kòrsou a bira un kolonia Hulandes na 1791. Na aña 1795 e katibunan na kòrsou a rebeldiá. E rebeldia tabata bou di mando di e lider Tula , un katibu ku tin un puesto importante den historia di Kòrsou. Despues di Inglatera(1834) i Fransia (1848) e gobièrnu Hulandes a abolí sklabitut na aña 1863. Dor ku e doñonan di katibu a pèrdè nan negoshi, nan a wòrdu rekompensá pa e gobièrnu Hulandes, ku 200 florin pa katibu. Te ku komienso di siglo 20, Kòrsou tabata biba di komèrsio, agrikultura i piskamentu. E ekonomia a drecha mas despues ku a bin diskubrí e reserva di petroli na Venezuela na aña 1914. Shell a bin ku un refineria di petroli na Kòrsou, konosí komo Isla. Durante di e Segundo Guera Mundial, Kòrsou tabatin un ròl importante den entrega di kombustibel na e trupanan aliá. Na 1953 Kòrsou a haña su outonomia polítiko.



BAI BÈK ARIBA