Mambo Beach ta e laman mas konosí na Kòrsou. Na 2012 nan a rekonstruí e laman aki, i for di e dia ei ela kambia di nòmber i bira Madero Beach Club. E laman aki no ta solamente bishitá pa turista, pero tambe yu di Kòrsou. Mambo Beach ta parti di Mambo Beach Boulevard. Tur dia hende ta bin aki pa sea kumpra kos, topa otro òf kome. Tur dia tin algu pa hasi na e laman aki. Tur djabèrnè anochi te ku djadumingu anochi tin happy hour i e laman ta bira un 'beach party’.
Den laman mes no tin masha moveshon, pero riba pista di baile tur hende ta baila. Mambo Beach ta di gran influensha riba e bida di anochi na Kòrsou. For di pubertat e muchanan lokal ta bin Mambo Beach i mas nan krese, e kustumber aki tambe ta krese ku nan.
Dor ku Kòrsou ta un isla chikitu, mayoria hende konosé otro i mayoria ta bai sali mesun luga pa topa otro. Sea pa selebrá wikènt òf selebrá bida manera nan ta bisa den boka di pueblo.
Mambo Beach ta un laman hopi bunita pa bo relahá. E personalnan ta hopi amabel, i nan ta sòru pa bo eksperenshá e miho ratu na laman. Na Mambo beach bo por hür kama i stul di laman. Bo por keda akinan hinter dia sin sinti ku a bira laf. E laman aki ta basta grandi i e ta grèns ku diferente otro laman manera: Cabana Beach, Wet ’n Wild, Lions Dive, Sea Aquarium etc. Pues bo por kana i disfrutá trankil di e laman tropikal aki.
Na Mambo Beach tin algu pa hasi pa tantu grandi komo chiki. Bo por hasi diferente sorto di deporte manera por ehèmpel volleybal. Pues akinan bo por mira di tur kos untiki, i e ta hopi rekomendabel si bo ta bin bishitá Kòrsou!