Punda i Otrobanda ta forma huntu e sentro di suidat históriko di Kòrsou. Meskos ku Punda, Otrobanda tambe tin hopi di mira. Otrobanda a wòrdu trahá na 1707, paso e tempu ei no tabatin mas espasio den Punda. Den Otrobanda bo lo mira prinsipalmente e arkitektura Hulandes.


Un luga hopi konosí den Otrobanda ta Rif Fòrt. E fòrti a wòrdu traha na aña 1828 pa defendé Otrobanda. Awor e fòrti ta konsistí di algun butik, restorant, bar etc. Anochi i speshalmente wikènt tin un ambiente hopi agradabel akinan.


Un otro luga popular den Otrobanda ta Brionplein ( Awasá). E nòmber Brionplein a bin dor di atmiral Pedro Luis Brión. Pedro tabata un Kurasoleño ku a kontribuí hopi na e lucha di libertat di Sur Amérika den siglo 19. Riba e plenchi bo por mira un estatua di dje.


Yen evenementu i festival ta wòrdu organisa riba Brionplein. Tin bes e hendenan lokal ta sinta pa bebe i kome algu òf pa skonde solo unratu. Ademas den banda di Rif fòrt tin un di e prome sentro komersialnan na Kòrsou, Renaissance Mall. Den e sentro komersial aki bo lo haña prinsipalmente markanan ‘high end’. Akinan lo bo haña un sine i Starbucks tambe. Renaissance Mall ta parti di Renaissance Hotel and Casino.


Den otrobanda no tin asina tantu kaya komersial manera den Punda. Tin solamente un kaya prinsipal ku diferente pakus di paña i elektrónika. Mayoria di e pakusnan den Otrobanda ta den man di Hindu i Arabirnan. Esakinan ta bende paña ku ta pagabel pa e públiko di Kòrsou.


E hòspital di mas grandi na Kòrsou kual ta Curacao Medical Centrel, tambe ta sítua den Otrobanda. Semper den bisendario di e hòspital lo bo mira hendenan lokal ku ta sea bayendo hòspital òf ku a kaba di sali di bishita for di einan. Mayoria bes nan ta keda den bisendario pa kome algu òf pa papia ku un otro hende ku tambe a sali hòspital.


Otrobanda tin un Viadukto tambe. Bou di e viadukto aki tin un kafetaria ku e hende lokal nan sa bin bebe kòfi , té òf ròm. Akinan lo bo mira mas tantu e hendenan di bario. Nan ta bin sinta for di mainta trempan te den oranan lat di atardi.


Semper ta dushi pa kana unratu den Otrobanda. Bo ta mira ègt kon e habitantenan ta pasa nan dia díario. Si bo ta biniendo for di Koningin Emmabrug (brùg di ponton) bayendo direkshon di e hòspital, bo por atmirá tur e kosnan bunita i úniko di Otrobanda. Bo ke atmirá e bunita kas nan di koló i e arkitektura Hulandes? E orei bo mester pasa den e hanchi nan tambe, pero tene na kuenta ku bo propio siguridat. Meskos ku tur otro kaminda, bo mester keda alerta ora bo pasa den e hanchi smal nan.



Image credits: Anji Barton


BAI BÈK ARIBA